Luk akkefietjes… HekselmesienHarry

‘Doo’t er ma ne fleenk’n vos’n of’, zea Merienske van de Krultange, ton e bie’n kapper in’ stool gung zit’n. Mer dat zin’n ’t kealtje achter in’t wochhok nig, (den zat stiekum de Pleeboi’j te leas’n) en méén datte éader an de büürt was.

Met opgestrek’n zeil kwamme in de been en stotter’n; ‘ikke wa- was al’n ke-ke-ke-tear bin ton-ton ie um ho-ho-hook kwam kie-kiek’n’. Met Merienske van de Krultange was nig oet veeld eslaang’n, keek op dat menneke daale, haal’n deep oadum en sprak t’r helder oet. “Mot je lüstern menneke, ik har al ne wekke leen afgespreekt met de barbier hier, dat hij bie mij ne fleenk’n vos’n d’r of zol knip’n.

Kiek, um kwat oawer half elme ha’w offe sprok’n en wat vunne tied is’t noe? Jüst, kwat oawer half elme..”. Het stotterkealtje snüt’n umstaandig ziene rooj’n zaddook vol en moompul’n; “toch veul ik mie-mie in de tu-tuk ge-gedreet’n en veul nattig-tighééd dat doo’k. Want veurkroep’n is ve-veur-kroep’n en noe ho-ho-hop ik ma, dat oene knipbüürte kats in de soe-soep löp”.
Hee smeet’ erotiese beukske vot, druip’n teleurgesteld of en smeet de düüre achter’t gat had too, dat deare…

De barbier, zelf ok zeurvitter eh veurzitter van de WKWF (Waske, Knip’n Watergolv’n, Feu’n). de oawerkoepelende kappersfederatie tot welbehaang’ van aln’s wat bie de klaant’n wat de heure betreft op’n kop d’r schier oet möt zeen. Temins’n noar ’n smaak van de klaant. Of ’t noe rastakapsel, stetjes, permenent’n. krulstetjes, laampekap’n met kral’n oawer ’n heel’n kop of ’n gezon-gladde gazon-oppervlakte mot wean.

En den barbier hef t’r ok mennig pries’n mette won, dat heffe.. Zo’n betje boamin de Sjempiejun’s Liege, kö’j wa zeng’…
Hoo den barbier heet? Tondeus’nTiens is de naam; geniet in brede kring’n dan ok grote faam! En loaw’t gekissebis seempel ofsloet’n met de konclussie.

Het stotterkealtje mos de achterbokse antrek’n en Merienske van de Krültange gung reukloos met de eare striekn’ en kreeg ne kaant’n kop met heure op de milliemeter d’r of. ’t Kost ’n pa stüüver, ma de Krültange kon d’r wear ’n pa wekke (wat zeg ik; ’n pa moand!) fleenk teeng an.

Doar ko’j kloar van op an, wo’k oe ma efkes zeng’n…
HekselmesienHarry